met een Garde van ontrent 200 gewapende mannen, den Koopman wellekom heetende, segghende seer blijde te wesen, dat zy aldaer ghekomen waeren, wel wetende dat daer door haere staet seer soude verbetert wesen, aenbiedende daer over alles wat mogelijck was te doen op 't geene souden versoecken, ende naer dat hy de artijculen gheconsenteert, ende den tol gheaccordeert hadde naer den eysch des Koopmans, dede hy door eenighe schermers ettelijcke factien bedrijven, doende oock de hoeren dansen, die seer kostelijck met goude ringhen aende armen, beenen, ende hals, verciert waeren, dat qualijck gheloovelijck is voor de geene die 't niet ghesien hebben, daer naer dede hy den Koopman in een kostelijck Palanquin, ende de andere op perden sitten, door alle straten der stadt leyden, die met bloemen behanghen waeren, met groot gheluyt van Trommelen, Schalmeyen, de Hoeren al dansende 't welck aldaer de maniere is, ende voor een groote eere ghehouden, wiert alsoo in een huys gebrocht, dat haer om voor eenen tijt in te woonen vergunt hebben.

Den 7^e dito des morghens is den Koopman den Gouverneur in sijn huys gaen besoecken, met hem nemende 4 ellen Scharlaken, 4 ellen Fluweel, wat glasen Spiegelen, Folie, Nagelen, ende Muscaten, 't welck hy in grooter weerden aen nam, ende alsoo den Koopman, een erve om een huys op te bouwen, versocht te koopen, heeft hy hem 't selve toegheseyt, beloovende selve een bequame plaetse op te spueren, die hy haer alsdan soude laten besien.

Den 8^e dito de 2 Persianers besocht, die aldaer wel het meeste ghebiet hebben, ende haer oock met een schenckagie vereert, die beloofden, alle de wevers daer ontrent woonachtich te ontbieden, ende de monsters der kleetkens naer te doen maecken.