koeltgen weder t'seyl gegaen, doch wiert stracks doot stille, soo dat naer het avont eeten, weder hebben moeten setten, om te behouden 't gene hadden. Desen dagh yeder maeltijt op 7 pont Rijs ghestelt, door dien seer minderden, oock consent, van Arack rantsoen te moghen halen, geconsenteert, d'welcke dus langhe opghehouden hadden om redenen; dan alsoo de watersucht onder 't volck seer begon te regneren, de beenen ende het hooft haer swellende, dat qualijck sien, oft gaen konden, door het continueel nat weder, hebben 't haer toeghelaten, op conditien den 10^e Ianuario verhaelt.

Den 17^e dito door dien 14 siecken in 't Schip hadden vande sucht, behalven dat het gheheele Scheepsvolck, daer oock van geinfecteert was, vresende dat zy daer door mochten invallen, hebben 't gheresolveert 2 oft 3 daghen onder Eylandt Varella te legghen, om de siecken wat te verquicken, ende versch water te halen,'t welck van noode hadden, soo hebben zy 's morgens den Ancker ghelicht, ende met N.O.wint daer naer toegheloopen, alwaer het ontrent Zuydoost Sonne setten. Te weten aen het Westeynde op 10 vadem moddergront, ½ Goteling schote van landt, sonden de Schuyte, ende Chaloepe vooruyt om het Eylandt te besichtigen, die stracks tijdinghe brochten, datter geen volck op en was, maer datter versch water, ende palmitasboomen waeren, soo dat zy stracks haere siecken aen landt brochten, ende de Schuyte om versch water te halen sonden; doch alsoo het hoogh water was, konden niet uytrechten, door dien brack was, van des naermiddaechs deden 2 tochten.

Den 18^e dito alsoo het desen vorigen nacht lanck ghereghent hadde, liep het versch water stercker als te vooren, soo dat 4 tochten met de Schuyte deden, ondertusschen volck in 't Bosch ghesonden, die voor